Америкада эр-хотин 375 йилга қамалди
Улар асраб олинган болаларни қул қилиб ишлатган.
АҚШнинг Ғарбий Виржиния штатида оқ танли эр-хотин асраб олинган беш нафар қора танли болани қул сифатида ишлатгани учун узоқ муддатга қамоқ жазосига ҳукм қилинди. 64 ёшли Женни Кей Уайтфизер 215 йилга, унинг 63 ёшли эри Доналд Ланза эса 160 йилга озодликдан маҳрум қилинди. Шунингдек, улар жабрланувчиларга 280 минг доллар миқдорида товон пули тўлашга мажбур.
Суд жараёнида маълум бўлишича, эр-хотин Миннесотадан Ғарбий Виржинияга кўчиб ўтиб, уй-жойсиз болалар бошпанасидан беш нафар болани асраб олган. Бироқ улар фарзандларига ғамхўрлик қилиш ўрнига, уларга фермада оғир меҳнат қилдирган, қаттиқ жазолаган.
Маҳаллий полиция жиноят ҳақида қўшниларнинг шикояти орқали хабар топган. Уларнинг айтишича, Доналд Ланза болаларни омборга қамаб қўйганини кўриб, ҳуқуқ-тартибот органларига мурожаат қилишган. Полиция текширувлари натижасида, эр-хотин одам савдоси ва мажбурий меҳнатга алоқадор деб топилган.
Ҳукм эълон қилингач, АҚШ ҳуқуқни муҳофаза қилиш органлари бу каби жиноятларга қарши курашни кучайтиришга ва болалар ҳуқуқларини ҳимоя қилиш чораларини оширишга чақирди.
