Сурияда бутун мамлакат бўйлаб интернет узилди
Таҳлилчилар интернет блокланиши минтақадаги ҳарбий ҳаракатлар билан боғлиқ бўлиши мумкинлигини таъкидламоқда.
Сурияда бутун мамлакат бўйлаб интернет тармоғи узилиб қолган. Бу ҳақда халқаро интернет-мониторинг хизмати “NetBlocks” маълумот берди.
Ҳозирча Сурия расмий идоралари интернет узилиши юзасидан расмий изоҳ бермаган. Мутахассисларнинг фикрича, бу техник носозлик ёки атайлаб амалга оширилган чеклов бўлиши мумкин.
Эслатиб ўтамиз, март ойи бошидан буён Сурияда собиқ президент Башар Асад тарафдорлари ва янги ҳукумат кучлари ўртасида тўқнашувлар бошланган. Ал-Латиқия, Тартус, Хама ва Ҳомс вилоятларидаги жангларда мингдан ортиқ одам ҳалок бўлгани хабар қилинган.
Экспертлар интернет узилишининг ушбу можаро билан боғлиқ бўлиши мумкинлигини тахмин қилмоқда. Ҳозирда мамлакатдаги алоқа тармоқлари ҳолати юзасидан қўшимча маълумотлар кутилмоқда.
