Техасда Tesla дилерлигида портловчи қурилмалар аниқланди

АҚШнинг Техас штати, Остин шаҳридаги Tesla дилерлик марказида бир нечта портловчи мосламалар топилди. Маҳаллий полиция ходимларининг хабар беришича, 24 март куни эрталаб дилерлик маркази ҳудудида шубҳали қурилмалар аниқланган. Хавфсизлик хизматлари дарҳол воқеа жойига етиб келган ва сапёрлар томонидан қурилмалар текширилиб, зарарсизлантирилган. Ҳодиса натижасида ҳеч ким жабрланмаган, лекин тергов ҳаракатлари давом этмоқда.

 

Мазкур ҳодиса Tesla компаниясига қаратилган сўнгги таҳдидлар фонида содир бўлди. АҚШ Федерал қидирув бюроси (ФТБ) Tesla объектларига қаратилган ҳужумларга қарши курашиш учун махсус тергов гуруҳи тузганини расман эълон қилди. ФТБ вакиллари бу каби ҳаракатларни вандализм, зўравонлик ва маиший терроризм сифатида баҳолашаётганини маълум қилишди.

 

Ҳуқуқ-тартибот идораларидаги манбаларга кўра, сўнгги пайтларда Tesla дилерлик марказлари, электромобиллари ва зарядлаш станцияларига қарши камида 48 та ҳужум содир этилгани ҳақида маълумотлар олинган. Расмийлар бундай ҳужумлар ортида қандай шахс ёки гуруҳлар турганини аниқлашга ҳаракат қилмоқда.

 

Остин полицияси ва ФТБ ушбу воқеа юзасидан хавфсизлик чоралари кучайтирилганини, Тесла объектлари атрофида қўшимча кузатув ва патруллик ишлари олиб борилаётганини маълум қилди. Ҳозирча гумонланувчилар ҳақида расмий маълумот берилмаган, аммо тергов давом этмоқда.