Африкада уч минг йиллик дарахтлар топилди
Дарахт ўзига хос уруғ тарқатиш хусусиятига эга.
Олимлар Танзания жануби-шарқидаги Удзунгва тоғлари ўрмонларида илгари фанга номаълум бўлган улкан дарахт турини аниқлашди. "Тессманниа принсепс" деб номланган бу яшил гигантлар 35-40 метр баландликка етади ва тахминан 2,7 метр диаметрга эга бўлиб, уларни қучоқлаш учун камида 5-6 киши керак бўлади. Энг ҳайратланарлиси шундаки, дастлабки ҳисоб-китобларга кўра, айрим дарахтларнинг ёши 2000-3000 йилга бориб етиши мумкин.
Бундан ташқари, Тессманниа принсепс ўзига хос уруғ тарқатиш механизмига эга: унинг пишган уруғлари қобиқдан катта масофага «портлаб» учиб кетади. Бу усул баъзи ўсимликларга хос бўлсада, гигант дарахтлар орасида жуда ноёб ҳодиса ҳисобланади.
Афсуски, бу қадимий дарахтларнинг келажаги хавф остида. Олимлар фақат икки кичик популяцияда тахминан 100 та дарахтни аниқлашди. Сезиларли даражада секин ўсиши ва чекланган ҳудудда жойлашгани сабабли, Тессманниа принсепс ҳар қандай ташқи таъсирга жуда заиф бўлиб, йўқолиб кетиш хавфи остида турибди.
Бу топилма Удзунгва ўрмонларини тиклаш бўйича кенг кўламли лойиҳа доирасида амалга оширилган. Ушбу лойиҳада қадимий тропик ўрмонларнинг муҳим қисмларини бирлаштириш ва экотизимни сақлаб қолиш мақсад қилинган.
