Бразилиянинг собиқ президенти давлат тўнтаришига уринишда айбланмоқда

 

Бразилия Олий суди мамлакатнинг собиқ президенти Жаир Болсонарога қарши давлат тўнтаришига уриниш бўйича иш очиш қарорини чиқарди.

 

Февраль ойида Болсонаруга бешта жиддий айблов қўйилган эди, жумладан, у президент Луиз Инасио Лула да Силванинг лавозимга киришишига тўсқинлик қилишга уринганликда айбланмоқда.

 

Собиқ президент эса барча айбловларни рад этиб, ўзини "сиёсий таъқиб қурбони" деб атамоқда. Агар суд уни айбдор деб топса, 40 йилгача озодликдан маҳрум этилиши мумкин.

 

Болсонарога қарши иш 2023 йил январь ойида содир бўлган воқеалар билан боғлиқ. Ўшанда унинг тарафдорлари пойтахт Бразилиядаги ҳукумат биноларига бостириб кириб, президент сайлов натижаларини бекор қилишга уринган. Мазкур тартибсизликлар 8 январь исёни номи билан тарихга кирган.

 

Ўтган ойда терговчилар Болсонарога яқин ҳарбий ва сиёсий доиралар ҳам давлат тўнтаришини режалаштиришда иштирок этганини маълум қилишди. Ҳозирда суд жараёни қачон бошланиши аниқ эмас, аммо бу Бразилия сиёсати учун катта аҳамиятга эга бўлган масала сифатида кўрилмоқда.