Нигерияда ҳарбий базага ҳужум уюштирилди
Террорчилар ҳарбий базага дронлар ёрдамида ҳужум қилган.
Нигериянинг Борно штатидаги ҳарбий базага уюштирилган ҳужум оқибатида камида 16 киши ҳалок бўлди. Аввалроқ тўрт кишининг ўлими ҳақида хабар берилган эди.
Хабарларга кўра, ҳужумни Нигерия шимоли-шарқида фаолият юритувчи ИШИД ва Боко Ҳарам террор ташкилотлари амалга оширган. Жангарилар аввал дронлар ёрдамида зарба берган, сўнг ер қисмидан ҳужум уюштириб, ҳарбий базанинг қурол-яроғ омборини талон-тарож қилган.
Камерун Мудофаа вазирлигининг маълум қилишича, ҳалок бўлганларнинг 12 нафари Камерун армияси ҳарбий хизматчилари бўлиб, 10 киши жароҳатланган. Ярадорлар Чад пойтахти Нджамена шаҳрига етказилган.
Мудофаа вазирлиги жангариларнинг йирик трансмиллий жиноий гуруҳлар билан алоқаси борлигини таъкидлаб, улар ҳужум чоғида мураккаб қуроллардан ва енгил-тактик машиналардан фойдаланганини қўшимча қилган.
