АҚШ 300 дан ортиқ хорижий талабани визасини бекор қилди
Улар Фаластинни қўллаб-қувватлагани учун АҚШдан чиқариб юборилади.
АҚШ давлат котиби Марко Рубионинг сўзларига кўра, Фаластинни қўллаб-қувватловчи намойишларда қатнашган 300 дан ортиқ хорижий талабанинг визаси бекор қилинган.
"Бекор қилинган визалар сони 300 дан ошган бўлиши мумкин. Биз буни ҳар куни амалга оширяпмиз. Ҳар сафар бу ақлдан озганлардан бирини топсам, визасини бекор қиламан", – деди Рубио.
Январь ойининг охирида АҚШ президенти Доналд Трамп антисемитизмга қарши кураш тўғрисидаги фармонни имзолаган ва Фаластинни қўллаб-қувватловчи намойишларда қатнашган талабаларни депортация қилиш билан таҳдид қилган эди.
Фармон иловасида: "Мамлакатимизда яшаётган ва радикал ғояларни қўллаб-қувватлаш учун намойишларга чиққан барча хорижликларга огоҳлантириш: 2025 йилда биз сизларни топиб, депортация қиламиз", – дейилади.
