Хитойда бола хўрозқанд сабаб мия жароҳати олди
7 соатлик операциядан сўнг бола омон қолган.
Хитойда олти ёшли бола оғзида лолипоп ушлаб турган ҳолда йиқилиб, бош миясига жиддий зарар етказди. Бамбук таёқчаси ҳалқумнинг орқа деворини тешиб ўтиб, бош суяги тагига етиб борган ва миянинг ҳаётий муҳим қисмларига зарар берган.
Бола йиқилиш вақтида қўллари билан ўзини ушлаб қолишга ҳаракат қилган, аммо бу вазиятни янада ёмонлаштирган — таёқ чуқурроқ кириб, чидаб бўлмас оғриқ келтирган. Ота-онаси дарҳол уни Зҳонгшан касалхонасига олиб борган, у ерда шифокорлар зудлик билан операция ўтказишган.
Шифокорлар текширувдан сўнг, 11 см узунликдаги таёқ миянинг ҳаракат ва мувофиқлаштириш учун жавобгар ҳудудига етиб борганини аниқлашган. Операция жуда хавфли бўлган, чунки таёқ бош суяги тагидаги йирик қон томирига тегиб турган. Жарроҳларнинг таъкидлашича, энг кичик хато бола ҳаётига зомин бўлиши мумкин эди.
Мураккаб операция 7 соат давом этган, аммо жарроҳлар таёқчани миянинг муҳим қисмларига зарар етказмасдан олиб ташлашга муваффақ бўлишган. Боланинг соғлиги тўлиқ тикланди — неврологик касалликлар, инфекциялар ёки бошқа асоратлар кузатилмади. Икки ҳафта ўтгач, у касалхонадан барқарор ҳолатда чиқарилган.
