Швеция Украинага 1,5 миллиард эвролик янги ҳарбий ёрдам юборади
Маблағ янги ҳарбий техника сотиб олиш ва саноат учун сарфланади.
Швеция Украина га 1,48 миллиард эвролик янги ҳарбий ёрдам кўрсатишини эълон қилди. Бу ҳақда қироллик мудофаа вазири Пол Жонсон маълум қилди.
"Бизнинг мақсадимиз – Украинани музокараларда кучли позицияга эга бўлиши учун максимал даражада қўллаб-қувватлаш", – деб таъкидлади Жонсон.
Жонсоннинг сўзларига кўра, 16 миллиард швед кронаси (тахминан 1,48 миллиард эвро) миқдоридаги ёрдам пакети Стокголм томонидан Киевга ажратилган энг йирик маблағ бўлади. Ушбу ёрдам пакетига кўра, 9 миллиард крона янги ҳарбий техника сотиб олишга сарфланади, яна 5 миллиард крона эса Украинанинг мудофаа саноатини молиялаштиришга йўналтирилади.
Швециянинг Украинага кўрсатган умумий ҳарбий ёрдам миқдори Россиянинг кенг кўламли босқини бошлангандан бери 80 миллиард крона (тахминан 7,4 миллиард эвро)ни ташкил этди.
Шунингдек, Швеция мудофаа вазири бошқа Европа давлатларини ҳам Украина га кўпроқ ёрдам беришга чақирди.
"Кўпроқ мамлакатлар яна кучлироқ ҳаракат қилиши керак. Европа Иттифоқи иқтисодиёти Россия иқтисодиётидан саккиз баравар йирик, шунинг учун сиёсий ирода мавжуд бўлса, катта ёрдам кўрсатиш мумкин. Муаммо шундаки, Европа мудофаа саноати тинчлик даврига мослашган", – деди Жонсон.
