АҚШнинг янги божлари глобал фонд бозорларига зарба бермоқда
Германиянинг ДАХ индекси кескин тушди, бозорлар инқирозга юз тутмоқда.
АҚШ президенти Доналд Трамп томонидан эълон қилинган янги тарифлар фонд бозорларида кескин пасайишга сабаб бўлди. Бугун эрталаб Германиянинг ДАХ индекси 2,3 фоизга тушиб, 21 873 пунктни ташкил этди – бу февраль ойининг бошидан бери энг паст кўрсаткичдир. МДАХ индекси 2,44 фоизга йўқотди, Европанинг умумий ЭуроСтохх 50 индекси эса 2 фоиздан кўпроқ пасайди.
Инвесторлар АҚШнинг импортга нисбатан қатъий тарифларини кескин қораламоқда. 5 апрелдан бошлаб барча импорт қилинадиган товарларга 10 фоизлик бож жорий этилади, Европа Иттифоқи мамлакатлари учун эса кейинги ҳафтадан бошлаб бу кўрсаткич 20 фоизни ташкил қилади.
“Бу эркин савдо даврининг охири”, деди Франклин Темплетон бозор стратегияси раҳбари Стивен Довер.
Трампнинг бож сиёсати глобал молиявий бозорларни ларзага солди. Хусусан, Токионинг Никкеи индекси савдонинг дастлабки 15 дақиқасида 4 фоизга тушиб кетди. Ноаниқлик шароитида инвесторлар хавфсиз активларга, жумладан, олтин ва давлат облигацияларига сармоя киритишни бошлади.
Бир неча ҳафта давомида Доналд Трамп кенг кўламли тариф чораларини эълон қилишни ваъда қилган эди, аммо амалда қабул қилинган қарорлар ҳатто энг паст прогнозлардан ҳам ёмонроқ бўлди. Экспертларнинг фикрига кўра, ушбу чора-тадбирлар нафақат Европага, балки бутун жаҳон иқтисодиётига оғир зарба бериши мумкин.
