Францияда эпидемия сабабли фавқулодда ҳолат эълон қилинди
Касалликнинг асоратлари жиддий бўлиши мумкин.
Франциянинг Ҳинд океанидаги Реюнион оролида чикунгуня вируси тез суръатда тарқалаётгани боис соғлиқни сақлаш тизимида фавқулодда “Оқ режа” жорий қилинди. Бу режа шифокорларни таътилдан чақириб олиш ва соғлиқни сақлаш тизимининг барча ресурсларини сафарбар этишга имкон беради.
17–23 март кунлари 6 мингга яқин янги ҳолат қайд этилган, умумий ҳолатлар сони 20 мингдан ошган. Касаллик кучли иситма, бўғим ва мушак оғриғи билан кечади, асоратлари жиддий бўлиши мумкин.
Маҳаллий касалхоналарда беморлар сони ортиб бораётгани сабабли шошилинч чора-тадбирлар кўрилмоқда. 7 апрелда 40 минг дозали вакцина ёрдамида эмлаш кампанияси бошланиши режалаштирилган. Энг юқори чўққи эса апрель ўрталарига тўғри келиши мумкин.
