Россия Украинада 4000 дан ортиқ танкни йўқотган

 

АҚШ Сенатидаги Қуролли кучлар бўйича қўмитада бўлиб ўтган эшитувлар давомида НАТОнинг Европадаги Бирлашган кучлари қўмондони, генерал Кристофер Каволи Россия армиясининг Украинадаги йўқотишлари ҳақида маълумот берди.

 

Генералнинг сўзларига кўра, Россия Украинадаги уруш давомида 4000 дан ортиқ танкни йўқотган. Бу — жанглар бошланганидан буён кузатилган энг йирик техник йўқотишлардан биридир.

 

Шунингдек, генерал Украина Қуролли Кучлари Қўшма Штатлар кўмагига жиддий эҳтиёж сезаётганини таъкидлади. Унинг айтишича, айнан АҚШ ҳарбий ёрдами туфайли Украина ҳаво мудофааси Россия ракеталарини нишонга олиш имкониятига эга бўлмоқда.

 

“Қўшма Штатлар томонидан тақдим этилаётган разведка маълумотлари Украина армиясига Россия қўмондонлик марказлари ва логистика инфратузилмаларига аниқ зарбалар йўллашда катта ёрдам бермоқда”, — деди генерал Каволи.

 

Унинг фикрича, агар АҚШ ёрдамида танаффус юзага келса, бу Украинани заифлаштириб қўяди ва Россияга стратегик устунлик бериши мумкин.