АҚШда кучли сув тошқинлари кузатилмоқда
Оқибатда минглаб авиақатновлар кечиктирилди.
Америка Қўшма Штатларининг марказий ҳудудларида кузатилган кучли ёмғирлар фавқулодда сув тошқинларига олиб келди. Хабарларга кўра, табиий офат оқибатида камида 16 киши вафот этган.
Тошқинлар сабаб 41 мингга яқин одам хавфли ҳудудда қолиб кетгани маълум қилинмоқда. Расмийлар фавқулодда эвакуация чораларини кўришга мажбур бўлди, кўплаб йўллар вақтинча ёпилди.
Ҳавонинг ноқулайлиги АҚШдаги транспорт ва инфратузилмаларга ҳам жиддий таъсир кўрсатди: 6000 дан ортиқ авиақатновлар кечиктирилди, айрим ҳудудларда электр энергияси узилиб, аҳолининг кундалик ҳаёти издан чиқди.
Мутасаддилар аҳолига хавфсизлик чораларига қатъий амал қилишни, расмий огоҳлантиришларни кузатиб боришни тавсия қилмоқда. Об-ҳаво шароитлари ҳали барқарорлашгани йўқ.
