Россия ҳудудларида кучли шамол кузатилмоқда
Ҳозирда эвакуация ишлари бошланган.
Россиянинг Жанубий Сибир минтақасида кучли шамол ва довуллар бир нечта ҳудудларга жиддий зарар етказди. Ноқулай об-ҳаво асосан Ҳакасиядаги дашт зонаси, Красноярск ва Олтой ўлкаси, шунингдек, Новосибирск ва Кемерово вилоятларида кучли ёнғинларнинг тарқалишига сабаб бўлди.
Расмий манбаларга кўра, шамол натижасида ёнғин тезлик билан кенгайиб, айрим аҳоли пунктларида турар жойларга ҳам етиб борган. Ҳудудларда электр таъминоти узилиб, кўплаб уй хўжаликлари электрсиз қолган.
Красноярск ўлкасининг Минусин шаҳрида фавқулодда ҳолат эълон қилиниб, бир нечта мавзеларда аҳолининг эвакуацияси бошлаб юборилган. Қутқарувчилар вазиятни назоратга олишга уринмоқда.
Маҳаллий ОАВларнинг маълумотига кўра, Красноярск шаҳрида кучли шамол бир аёлни балкондан учириб юборган ва аёл ҳалок бўлган.
Об-ҳаво мутахассислари шамол кучининг айрим жойларда 25–30 м/с дан ошганини қайд этмоқда. Аҳолига зарурат бўлмагунча ташқарига чиқмаслик, хавфсизлик қоидаларига амал қилиш тавсия этилмоқда.
