Жанубий Кореяда президентлик сайлови ўтказилади
Сайловлар 3 июнь òтказилиши режалаштирилган.
Ушбу сайловда лавозимидан четлатилган собиқ президент Юн Сок Ёлнинг вориси аниқланади. Ҳукумат манбаларининг хабар беришича, сайлов санаси бош вазир вазифасини бажарувчи Хан Док Су бошчилигидаги Вазирлар Маҳкамаси йиғилишида тасдиқланиши кутилмоқда.
Конституциявий суднинг импичмент тўғрисидаги қароридан сўнг, мамлакат 60 кундан кечиктирмай муддатидан олдин президентлик сайловини ўтказишга мажбур эди. Агар тасдиқланган санага кўра сайлов ўтказилса, номзодлар 11 майдан кечиктирмай ариза топширишлари керак бўлади, сайлов компанияси эса 12 майда бошланади. Янги президент сайловлар якунланиши билан 3 июнда ўз лавозимига киришади.
2024 йилнинг декабрида Жанубий Корея президенти Юн Сок Ёл мамлакатда ҳарбий ҳолат жорий этишга уриниб кўрган ва шундан сўнг парламент уни исён кўтаришга уринганликда айблаб, импичмент эълон қилган. Юн 14 декабрдан президентлик лавозимидан четлатилган, аммо ҳарбий ҳолат жорий этишнинг сиёсий жиҳатдан тўғри қарор эканини таъкидлаган.
Кейинчалик, Юн Сок Ёлнинг импичменти учун Конституциявий суднинг қарори кутилган ва март ойида суд уни ҳибсдан озод қилиб, ҳибсга олиш ордерини бекор қилган. 4 ой ўтгач, Юн лавозимидан бутунлай четлатилган, чунки у давлатнинг қонун устуворлиги ва демократия тамойилларини бузган деб ҳисобланган.
