Буюк Британияда бачадон трансплантациясидан сўнг илк чақалоқ дунёга келди
Бачадонсиз аёл биринчи марта она бўлди.
Буюк Британияда бачадони трансплантация қилинган аёл биринчи марта она бўлди. 36 ёшли Грейс Девидсон бачадонсиз туғилган бўлиб, 2023 йилда ўз синглисининг бачадонини қабул қилган эди. Бу мамлакат тарихидаги илк муваффақиятли бачадон трансплантацияси ҳисобланади.
Жорий йилнинг февраль ойида Грейс ва унинг турмуш ўртоғи, 37 ёшли Ангус, ўзларининг илк фарзандлари – қиз фарзандларини дунёга келтиришди. Жуфтлик унга донор — Грейснинг синглиси — шарафига Эми деб исм қўйишди.
Чақалоқ Эми икки килограммдан сал кўпроқ вазнда туғилган.
Ҳозирда Шимолий Лондонда яшаётган, аслида Шотландиядан бўлган эр-хотин ҳозир трансплантация қилинган бачадон ёрдамида иккинчи фарзанд кўришни ҳам орзу қилишмоқда. Улар дастлаб шахсий ҳаётларини оммага ошкор қилмасликка қарор қилишган, аммо Эми хавфсиз туғилгач, ўз ҳикояларини ББС билан бўлишишга қарор қилишди.
Жарроҳлар жамоаси шу пайтгача вафот этган донорлар ёрдамида яна учта бачадон трансплантациясини амалга оширганини маълум қилишди. Уларнинг режасига кўра, клиник синовлар давомида жами 15 та шундай операция ўтказилиши кўзда тутилган.
