Канада АҚШни судга берди
АҚШнинг бож ставкалари халқаро савдо қоидаларига зид деб ҳисобланмоқда.
Канада ҳукумати Қўшма Штатлар томонидан Канададан импорт қилинадиган автомобиллар ва уларнинг эҳтиёт қисмларига қўйилган 25 фоизлик бож ставкаларидан норози бўлиб, Жаҳон Савдо Ташкилотига (ЖСТ) расмий шикоят билан мурожаат қилди.
ЖСТ расмий сайтида эълон қилинган баёнотга кўра, Канада ушбу тарифлар халқаро савдо қоидаларига зид деб ҳисоблайди ва АҚШ билан низо юзасидан расмий маслаҳатлашувлар ўтказишни талаб қилмоқда.
Оттаванинг фикрича, Қўшма Штатлар томонидан жорий этилган бу бож ставкалари 1994 йилда имзоланган Тарифлар ва Савдо бўйича Бош келишув (ГАТТ) талабларига зид келади ва АҚШнинг халқаро мажбуриятларига мос эмас.
ЖСТ низомига кўра, аъзо давлатлар ўртасида низо чиққан тақдирда, биринчи босқич сифатида томонлар маслаҳатлашувлар йўли билан муаммони ҳал қилишга ҳаракат қиладилар. Агар бу босқичда келишувга эришилмаса, иш арбитражга ёки судлов панелига топширилиши мумкин.
