Туркияга 7 мингта BYD автомобили олиб келинди
Компания мамлакатда ўз улушини кенгайтиришга ҳаракат қилмоқда.
Хитойнинг автомобиль гиганти BYD ўз маҳсулотларини халқаро бозорга етказиб беришда йирик қадам ташлади. Узунлиги 199 метр, кенглиги 38 метр бўлган “BYD CHANGZHOU” номли юк ташувчи кема 21 кун давом этган океан сафаридан сўнг Туркиянинг Истанбул шаҳрида жойлашган Сефапорт портига етиб келди.
Маҳаллий оммавий ахборот воситаларининг хабар беришича, ушбу кема бортида 7 минг дона BYD автомобили олиб келинган. Бу машиналар Туркия бозорида сотувга чиқарилиши режалаштирилган бўлиб, компания мамлакатда ўз улушини кенгайтиришга ҳаракат қилмоқда.
Мутахассисларнинг фикрича, бу йирик юк партияси BYDънинг Европа бозорига чиқиш стратегиясида муҳим қадамлардан биридир. Туркия географик жиҳатдан Европага яқинлиги сабабли, компания учун муҳим логистика марказига айланмоқда.
