Ҳиндистонда сохта жарроҳ 15 кишини операция қилди
Операция қилинган 7 нафар бемор вафот этган.
Ҳиндистоннинг Мадҳя-Прадеш штатига қарашли Дамоҳ туманида ўзини британиялик юрак жарроҳи сифатида таништирган шахсга нисбатан тергов ишлари бошланди.
Маълумотларга кўра, у ўзини британиялик кардиолог сифатида кўрсатиб, сохта ҳужжатлар орқали хусусий шифохонада иш бошлаган ва камида 15 нафар беморга юрак операцияларини ўтказган.
Ҳиндистоннинг Инсон ҳуқуқлари миллий комиссияси аъзоси мазкур иш бўйича расмий тергов бошланганини маълум қилган.
“Юрагига операция қилинган беморлар орасида камида 7 кишининг бевақт ўлими қайд этилган”, — деб ёзди у ўзининг ижтимоий тармоқ саҳифасида.
Воқеа юзасидан жамоатчиликда жиддий норозилик юзага келмоқда. Беморлар қариндошлари шифокорнинг ҳаракатларидан шубҳалана бошлаганидан сўнг, у изсиз ғойиб бўлган.
