Британияда сунъий интеллект потенциал қотилларни аниқлаши мумкин
Ушбу тизим руҳий саломатлик ва оилавий зўравонликка оид нозик маълумотларни ҳам ўз ичига олади.
Буюк Британия Адлия вазирлиги потенциал қотилларни аниқлаш учун сунъий интеллект алгоритмларидан фойдаланадиган лойиҳа устида иш олиб бормоқда. Лойиҳа дастлаб “Қотилликларни башорат қилиш лойиҳаси” деб номланган бўлсада, кейинчалик “Хавфни баҳолашни яхшилаш учун маълумотлар алмашиш” номига ўзгартирилди. Ушбу тизим 2015 йилгача бўлган жиноят маълумотларини таҳлил қилиб, судланган жиноятчилар орасида келажакда оғир жиноят содир этиш эҳтимоли юқори бўлган шахсларни аниқлашга ҳаракат қилади.
Лойиҳанинг танқидчилари, жумладан Статеватч ташкилоти вакиллари, бу тизимни "даҳшатли ва дистопик" деб аташди. Улар сунъий интеллект ирқий ва ижтимоий жиҳатдан кам таъминланган жамоаларга нисбатан нотўғри қарорлар чиқариши мумкинлигидан хавотирда. Шунингдек, ушбу тизим руҳий саломатлик, оилавий зўравонлик ва ўз жонига қасд қилишга оид нозик маълумотларни ҳам ўз ичига олгани танқидга сабаб бўлмоқда.
Адлия вазирлиги эса лойиҳанинг ҳозирча фақат тадқиқот характерига эга эканини таъкидламоқда. Уларнинг айтишича, бу ёндашув Пробация ва қамоқхона хизматидаги мавжуд хавфни баҳолаш тизимларини янада такомиллаштиришга ёрдам беради. Якуний натижалар ҳақида эса яқин орада ҳисобот эълон қилиниши кутилмоқда.
