Венесуэлада фавқулодда иқтисодий вазият эълон қилинди
Президент бу қарорни миллий иқтисодий барқарорликни таъминлашга қаратилган деб таърифлади.
Венесуэла президенти Николас Мадуро мамлакатда 60 кунлик иқтисодий фавқулодда ҳолат эълон қилди. Президентнинг таъкидлашича, бу чоралар Венесуэла иқтисодиётини АҚШнинг босими ва санкцияларидан ҳимоя қилишга хизмат қилади. Мадуро бу қарорни миллий иқтисодий барқарорлик ва ўсишни таъминлашга қаратилган деб таърифлади.
Фармонга кўра, ҳукумат барча даражадаги солиқларни вақтинча тўхтатиб туриш, тасдиқланган бюджетдан ташқари молиялаштириш имкониятини яратиш, солиқ тўлашдан бўйин товлашга қарши кураш ва импорт ўрнини босувчи соҳаларни ривожлантириш чораларини кўради. Президент, шунингдек, сармоядорларга махсус имтиёзлар ваъда қилди.
Фармон кучга кириши учун Венесуэла Миллий мажлиси ва Олий суднинг Конституциявий палатаси томонидан тасдиқланиши лозим. Ҳозирча халқаро ҳамжамият бу қарорни эҳтиёткорлик билан кузатмоқда.
