Буюк Британия ва Норвегия Украинага 580 миллион долларлик ҳарбий ёрдам ажратмоқда
Маблағлар Буюк Британия бошчилигидаги халқаро фонд орқали ажратилади.
Буюк Британия ва Норвегия Украина Қуролли Кучларини қўллаб-қувватлаш мақсадида 580 миллион долларлик янги ҳарбий ёрдам пакетини эълон қилди.
Британия Мудофаа вазирлиги берган хабарларга кўра, бу ёрдам Россия билан уруш ҳолатида Украина мудофаа салоҳиятини кучайтиришга қаратилган. Пакетнинг асосий қисми — 450 миллион фунт стерлинг — Буюк Британиядан, қолган қисми эса Норвегиядан тақдим этилади. Бу Европа давлатларининг Украина билан бирдамлигини кўрсатади.
Молиявий ёрдам ҳарбий техникалар ва ускуналарни таъмирлаш, радар тизимлари, танкка қарши миналар, юз минглаб дронларни ўз ичига олади.
Техника ва ускуналар етказиб берилиши Британия ва Украина компаниялари томонидан амалга оширилади.
Ёрдам пакети ҳақидаги расмий эълон НАТО доирасидаги Украина мудофаасига бағишланган йиғилишда, Брюсселда эълон қилинади. Йиғилишга Британия мудофаа вазири Жон Гили ва Германия мудофаа вазири Борис Писториус раислик қилади.
Алоқа гуруҳи НАТО аъзолари ва Украинани қўллаб-қувватловчи бошқа давлатлар ўртасидаги ҳамкорликни мувофиқлаштирувчи муҳим платформа ҳисобланади.
