Қозоғистонда нодир ер металларининг йирик кони топилди
Мазкур эълон Европа Иттифоқи билан ҳамкорликни кучайтириш бўйича стратегик қадам сифатида баҳоланмоқда.
Европа Иттифоқи – Марказий Осиё саммити арафасида Қозоғистон ҳукумати ноёб ер элементлари захиралари аниқланганини эълон қилди. Қарағанда вилоятида жойлашган “Янги Қозоғистон” деб номланган кон ҳудудида тахминан 1 миллион тоннага яқин церий, лантан, неодимий ва иттрий каби элементлар мавжуд. Бу элементлар асосан смартфонлар, рақамли камералар ва бошқа рақамли қурилмаларда қўлланилади.
Қозоғистон Саноат ва қурилиш вазирлигига кўра, ушбу ҳудудда аниқланган умумий захира 935,4 минг тоннани ташкил этади, лекин дастлабки ҳисоб-китобларга кўра бу кўрсаткич 20 миллион тоннагача етиши мумкин. Бироқ, мутахассислар ҳали бу конда тўлиқ геологик ва иқтисодий таҳлил олиб борилиши зарурлигини таъкидлашмоқда.
Мазкур эълон Европа Иттифоқи билан ҳамкорликни кучайтириш бўйича стратегик қадам сифатида баҳоланмоқда. Қозоғистон ҳозирда технологик имкониятларга эга эмаслиги сабабли хорижий инвесторлар ва ҳамкорлар, жумладан Хитой ва ЕИ билан ҳамкорлик қилишга тайёрланмоқда. Конни ишга тушириш учун 10-12 йил ва тахминан 10 миллион доллар сармоя талаб этилиши мумкин.
