Трамп Гренландияни АҚШ таркибига қўшиш бўйича аниқ режалар тузди
Гренландияликларга йилига 10 минг доллардан беришини айтган.
Хабарларга кўра, Трамп маъмурияти Гренландияни Қўшма Штатлар таркибига қўшиш режасини ишлаб чиқиб, бу ҳақдаги кўрсатмаларни тегишли идораларга юборган. Режага кўра, орол аҳолисининг АҚШ билан бирлашиш истагини ўзи илгари суриши учун махсус медиа кампания ўтказилиши ҳам мўлжалланган.
Маълумотларда бу кампания аллақачон иш бошлангани айтилмоқда. АҚШ расмийлари Дания Гренландия аҳолисига етарли даражада эътибор бермаётганини очиқ айтмоқда. Шунингдек, фақат Қўшма Штатлар оролни Россия ва Хитой таъсиридан ҳимоя қила олишини таъкидлашмоқда. Трамп эса АҚШ гренландияликларга “бойиб кетишда” ёрдам беришини билдирган.
Бундан ташқари, Трамп маъмурияти Гренландия аҳолиси учун молиявий рағбатлантириш чораларини ҳам кўриб чиқмоқда. Масалан, Дания ҳар йили ажратадиган 600 миллион долларлик субсидиялар ўрнига, ҳар бир фуқаро учун йилига тахминан 10 минг доллар тўлов жорий этилиши мумкин.
Маъмуриятдаги айрим амалдорлар бу харажатлар Гренландиядаги мис, олтин, уран ва нефть каби табиий бойликлардан олинадиган даромадлар орқали қопланишини ҳисобга олишмоқда.
