АҚШнинг Россияга нисбатан босими кучаймоқда
Агар сулҳ битими имзоланмаса АҚШ Россияга санкциялар жорий этишини таъкидлади.
Хабарларга кўра, агар апрель ойи охиригача Россия ва Украина ўртасида сулҳ битими имзоланмаса, АҚШ ҳукумати Россияга қарши янги санкциялар тўлқинини бошлаши мумкин.
Манбаларнинг таъкидлашича, бу чораларни президент Доналд Трамп ўз ваколатлари доирасида тўғридан-тўғри амалга ошириши ёки бу борадаги қонун лойиҳасини Конгрессга киритиши мумкин. Бу таклифлар ҳозирча муҳокама босқичида бўлсада, АҚШ сиёсий доиралари ичида Россияга босимни кучайтиришга тайёргарлик борлиги аён.
Янги санкциялар молиявий сектор, энергетика саноати ва стратегик технологиялар экспортини нишонга олиши кутилмоқда.
Шунингдек, АҚШ Европа Иттифоқи ва бошқа иттифоқчилар билан ҳамкорликда ҳаракат қилишни режалаштирмоқда, бу эса санкциялар таъсирини янада кучайтиради.
Ушбу чоралар, биринчи навбатда, Россияни Украина билан музокараларга жиддий ёндашишга ундаш мақсадида кўрилмоқда. Айни дамда эса сулҳ битими бўйича дипломатик ҳаракатлар давом этмоқда, бироқ музокаралар суст кетаётгани сабабли босим кучайтирилиши эҳтимоли ортмоқда.
