Россия коинотда ядро қуроли жойлаштирмоқчи
Россия сунъий йўлдошларга қарши қурол ишлаб чиқмоқда.
НАТО бош котиби Марк Рютте Россия коинотда ядро қуроли жойлаштириш имконини кўриб чиқаётгани ҳақида огоҳлантирди. Унга кўра, бу қурол сунъий йўлдошларга қарши қўлланилиши мумкин.
Рюттенинг таъкидлашича, Россиянинг мавжуд коинотдаги салоҳияти замонавий Ғарб технологияларидан орқада қолган. Шу боис Москва ўз қудратини ошириш учун ядровий технологиялар орқали устунликка эришишга уринмоқда.
Бош котиб НАТОнинг бу янги таҳдидларга қарши чоралар кўраётганини айтиб, қуйидаги ҳаракатларни санаб ўтди: разведка маълумотлари алмашинуви, миллий коинот қўмондонликлари ташкил этилиши ва ҳимояланган сунъий йўлдошлар ишлаб чиқилиши.
"Бугунги кунда коинот тобора тиқилинч, таҳликали ва олдиндан башорат қилиб бўлмайдиган маконга айланяпти", — деди у.
Рютте шунингдек, НАТО илк бор Арктика ҳудудида сунъий йўлдошлар орқали кузатувни кенгайтираётганини маълум қилди. Унинг айтишича, Хитой ва Россия минтақадаги янги денгиз йўлларидан фаол фойдаланмоқда ва айрим ҳудудларни ҳарбийлаштирмоқда.
"Сунъий йўлдошлар орқали биз ҳаракатларни назорат қилишимиз, қўшинларимизни ишончли ва хавфсиз алоқалар билан таъминлашимиз мумкин", — деди НАТО раҳбари.
