Украинада ҳарбий ҳолат 90 кунга узайтирилади
Президентлик сайловлари яна кечиктирилиши мумкин.
Украина парламенти – Олий Рада – 2025 йил 15–18 апрель кунлари навбатдаги ҳарбий ҳолат ва умумий сафарбарлик муддатини узайтириш бўйича қарор қабул қилиши кутилмоқда. Бу ҳақда депутат Ярослав Железняк ўзининг YouTube каналида маълум қилди.
Эслатиб ўтамиз, ҳарбий ҳолат Украинада 2022 йил февраль ойида жорий этилган бўлиб, шундан буён ҳар 90 кунда узайтириб келинмоқда. Охирги марта 2025 йил январь ойида ҳарбий ҳолат 8 февралдан 9 майгача бўлган муддатга узайтирилган эди.
Железнякнинг таъкидлашича, бу сафар ҳам ҳарбий ҳолат одатдагидек олдиндан узайтирилади. Агар бу ҳолат август ойигача давом этса, президентлик сайловларини ўтказиш имконияти бўлмайди. Сайловларга тайёргарлик жараёни эса камида 90 кун вақт талаб қилади.
Маълумот учун, амалдаги президент Владимир Зеленскийнинг ваколати 2024 йил 20 майда якунланган. Аммо уруш шароити туфайли президент сайловлари ўтказилмаган эди. Айрим халқаро сиёсатчилар, жумладан АҚШ собиқ президенти Доналд Трамп Зеленскийни “сайловсиз диктатор” деб атаб, унинг рейтинги 4 фоизгача тушганини билдирган.
