Трамп 1 миллион муҳожирни депортация қилишни режаламоқда
Трамп депортация бўйича тарихий рақамларни янгиламоқчи.
Хабарларга кўра, Доналд Трамп бир йил ичида 1 миллион муҳожирни АҚШдан чиқариб юборишни режалаштирмоқда.
Агар бу режа амалга ошса, бу Америка тарихидаги энг йирик депортация бўлади. Бунгача энг юқори кўрсаткич Барак Обама даврида қайд этилган бўлиб, 2012 йилда 400 минг муҳожир чиқариб юборилган эди.
Аммо таҳлилчилар Трампнинг бу мақсадини амалга ошириш реал эмаслигини таъкидлашмоқда. Сабаблари орасида етарли маблағ ва ходимларнинг йўқлиги, шунингдек, муҳожирларнинг суд орқали депортацияга қарши чиқиш ҳуқуқи мавжудлиги келтирилмоқда. Бундай суд жараёнлари йиллаб давом этиши мумкин.
Режа устида Оқ уйдаги сиёсий масалалар бўйича раҳбар ўринбосари Стивен Миллер ишлаётгани айтилмоқда. Вариантлардан бири сифатида ҳозирда АҚШда яшаб турган, лекин уларнинг ватани уларни қабул қилмаётган 1,4 миллионга яқин муҳожирни чиқариб юбориш кўриб чиқилмоқда.
Нашрга кўра, Вашингтон бу борада 30 га яқин давлат билан музокара олиб бормоқда. Трамп маъмурияти депортация статистикаси эълонини тўхтатган. Аммо АҚШ Ички хавфсизлик вазирлиги маълумотларига кўра, 2025 йил бошидан бери 117 минг муҳожир депортация қилинган.
