Трамп 90 кунда 90 та савдо битимини мақсад қилмоқда
Трамп глобал савдо фаолиятини кучайтиришга ҳаракат қилмоқда.
АҚШ президенти Доналд Трамп маъмурияти 90 кун ичида 90 та савдо битими тузишни мақсад қилган. Бу ҳақда унинг савдо масалалари бўйича маслаҳатчиси Питер Наварро маълум қилди.
Унинг сўзларига кўра, музокараларни юритишда АҚШ молия вазири Скотт Бессент, савдо бўйича вакил Жеймисон Грир ва савдо вазири Говард Лютник иштирок этиши мумкин, бироқ асосий музокарачилик ролини Трампнинг ўзи бажаради.
14 апрель куни Европа Иттифоқининг савдо бўйича комиссари Марош Шефчович бож тарифлари юзасидан музокаралар ўтказиш учун Вашингтонга келади. Аммо айни вақтда молия вазири Бессент Аргентинадаги иқтисодий ислоҳотларни қўллаб-қувватлаш мақсадида Буэнос-Айресда бўлиши режалаштирилган.
Таъкидланишича, бундай кўламдаги музокараларни бир вақтнинг ўзида ўтказиш Трамп ҳукумати учун жуда катта юк бўлиши мумкин. Собиқ савдо музокарачиси Венди Катлер эса бу вазифани амалга ошириш молиявий бозорларга маъқул келадиган битимлар тузишни талаб қилишини, бу эса осон эмаслигини билдирди.
