Ҳусийлар АҚШни Ямандаги ҳужумларда айблади
Иккита баллистик ракета Исроилга учирилди.
Ямандаги ҳусийлар ҳаракати АҚШни Сана жанубидаги объектларга ҳаво ҳужумлари уюштиришда айблади. Ҳаракатнинг матбуот котиби Насриддин Амернинг хабар беришича, ҳужумлар оқибатида камида икки киши ҳалок бўлган ва 10 нафар фуқаро жароҳат олган. Ҳусийлар мамлакатнинг бошқа ҳудудларига ҳам зарбалар берилганини маълум қилишган. Вашингтон эса бу ҳужумлар юзасидан ҳозирча расмий изоҳ бергани йўқ.
Ҳужумлар фонида ҳусийлар Исроилга иккита баллистик ракета учирганликларини маълум қилишди. Исроил мудофаа кучлари - САХАЛ бу ҳужумларни муваффақиятли равишда қайтарганини эълон қилди.
Ямандаги вазият минтақадаги тарангликни янада кучайтирмоқда. АҚШ ва Исроилга қарши ҳусийлар томонидан амалга оширилаётган ҳаракатлар минтақавий кескинликнинг янги босқичга кўтарилганини кўрсатмоқда.
