Исроил ҳарбийлари Ғазодаги 1,2 километрлик туннелни йўқ қилди
Туннель яқинидан 20 га яқин портловчи қурилмалар топилган.
Исроил мудофаа кучлари (ИДФ) Ғазо секторининг шимолий қисмида жойлашган, ҲАМАС ҳаракатига тегишли деб ҳисобланган 1,2 километр узунликдаги ва 20 метр чуқурликдаги туннелни йўқ қилганини маълум қилди. ИДФ матбуот хизматининг хабар беришича, бу туннель ҳарбий операциялар учун мўлжалланган бўлиб, у орқали ҲАМАС жангчилари урушда ҳаракат қилган.
Операция давомида ИДФ дронлари қўшинлар яқинида портловчи мослама ўрнатаётган бир неча шахсни аниқлаб, уларни нишонга олиб йўқ қилган. Туннель яқинида 20 га яқин портловчи қурилмалар, танкка қарши ракеталар ва бошқа қуроллар сақланган омбор ҳам аниқланган.
Шу куни эрталаб Исроил армияси Ғазо шимолидаги Ал-Аҳли касалхонасига ҳам зарба берганини эълон қилди. Исроил томони бу ерда ҲАМАС қўмондонлик маркази жойлашганини билдирган. Зарба берилишидан олдин шифохона ва тинч аҳолига зарар етказмаслик учун эҳтиёт чоралар кўрилгани таъкидланди.
