Япония аҳолиси кескин камаймоқда

 

Япония тарихдаги энг кескин демографик пасайиш ҳолатини бошдан кечирмоқда. 2024 йил 1 октябрь ҳолатига кўра, мамлакат аҳолиси ўтган йилга нисбатан 898 минг кишига камайди. Бу 1950 йилдан бери юритилаётган статистик кузатувлардаги энг катта йиллик йўқотишдир.

 

Япония фуқаролари сони ҳозирда 120,3 миллион кишини ташкил этмоқда. Хорижлик резидентлар билан биргаликда умумий аҳолининг сони 123,8 миллионга тенг, бу эса 550 минг кишилик камайишни англатади. Мамлакатда аҳоли сонининг пасайиши кетма-кет 14 йилдан бери давом этмоқда.

 

Маълум қилинишича, Япония дунёдаги энг паст туғилиш кўрсаткичларига эга бўлиб қолмоқда. 2024 йил февралида эса 100 йиллик туғилиш антирекорди қайд этилди. Шу билан бирга, ўлим ҳолатлари эса тарихий энг юқори даражага етди.

 

Бу демографик ўзгаришлар меҳнат бозорига бевосита таъсир кўрсатмоқда — компаниялар малакали ишчи кучи танқислигидан азият чекмоқда. Ҳукумат ёш хорижий мутахассисларни жалб этиш йўлларини кўриб чиқмоқда, бироқ миграция қоидалари ҳануз қатъийлигича қолмоқда.

 

Вазирлар Маҳкамаси бош котиби Ёшимаса Хаяши ҳукумат ёш оилаларни иқтисодий қўллаб-қувватлашга қаратилган чора-тадбирлар устида ишлаётганини таъкидлади. Мақсад — ҳар бир фарзанд кўришни истаган оилага бу қарорни амалга оширишга имкон беришдир.

 

Маълумотларга кўра, ёшлар орасида оила қуриш истаги пасайиб бормоқда. Сабаблари орасида беқарор бандлик, ҳаёт тарзидаги ўзгаришлар ва ижтимоий қарашларнинг эволюцияси бор.