АҚШ Meta компаниясини парчалаш учун судга берди
АҚШда Metaга қарши антимонополия суд иши давом этмоқда.
Meta компаниясига қарши олиб борилаётган йирик антимонополия судида Марк Зускерберг иккинчи кун кетма-кет гувоҳлик бермоқда. АҚШ Федерал савдо комиссияси (ФТС) Facebook, Instagram ва WhatsApp'нинг эгаси бўлган компанияни рақобатни бузишда айбламоқда.
Судда таъкидланишича, Meta Instagram (2012 йил) ва WhatsApp’ни (2014 йил) сотиб олиб, уларни мустақил рақобатчилар бўлишидан олдин ўзига қўшиб юборган. ФТС бу харидларни ноқонуний деб ҳисоблаб, компанияни ажратиб юборишни талаб қилмоқда.
Марк Зускербергнинг 2012 йилдаги электрон хатларида Instagram "қўрқинчли рақиб" сифатида тилга олинган. ФТС бу ёзишмаларни асос қилиб кўрсатмоқда. Meta эса ўз навбатида харидлар қонуний бўлганини, бу иловалар рақобатчилар билан курашаётганини ва фойдаланувчилар учун бепул хизмат кўрсатишини таъкидламоқда.
Агар ФТС бу ишда ғалаба қозонса, бу сўнгги 40 йил ичида биринчи марта АҚШ ҳукумати йирик технологик компаниянини парчалаб юборган бўлади.
