АҚШ Хитойни изоляцияга олиш учун кенг коалиция яратмоқчи
Трамп 70 та давлатни Хитойга қарши глобал божхона блокига чорламоқда.
АҚШ президенти Доналд Трамп бошчилигидаги маъмурият Хитой иқтисодиётини глобал миқёсда изоляция қилиш мақсадида 70 дан ортиқ давлат билан ҳамкорлик ўрнатишга уринмоқда.
Вашингтон тарифлар бўйича олиб борилаётган янги музокараларда савдо ҳамкорларига қуйидагича таклиф билан чиқмоқда: агар улар Хитой маҳсулотларига киришни чекласа, АҚШ ўз бож сиёсатини қайта кўриб чиқишга тайёр. Хусусан, Хитойдан келаётган саноат маҳсулотларига нисбатан харидларни камайтириш, Хитой компанияларининг фаолиятига тўсқинлик қилиш ва “оралиқ транзит” орқали Хитой маҳсулотларини ўз ҳудуди орқали бошқа бозорларга ўтказишга йўл қўймасликни таклиф қилмоқда.
АҚШнинг бу босими Пекин билан кучайиб бораётган савдо урушининг давомидир. Яққол мисол — АҚШ Хитой маҳсулотларига 145 фоизгача бўлган божларни жорий қилган бўлса, Хитой ҳам жавобан Америка товарларига 125 фоизлик божлар билан жавоб қайтарди.
Трамп маъмурияти халқаро савдо занжирларини Хитойдан узоқлаштириш орқали глобал ишлаб чиқариш тақсимотини ўзгартиришга уринмоқда. Бу эса глобал иқтисодиётга узоқ муддатли таъсир кўрсатиши мумкин.
