Гонконг АҚШ божлари сабабли почта хизматларини тўхтатди
27 апрелдан Гонконгдан АҚШга товар жўнатмалари қабул қилинмайди.
Гонконг АҚШ билан юзага келган савдо зиддиятлари туфайли 27 апрелдан бошлаб АҚШга почта хизматларини чеклайди. Расмий баёнотга кўра, Гонконг Почтаси эндиликда АҚШга қуруқлик ва денгиз йўллари орқали юборилиши керак бўлган товарларни қабул қилмайди. Шунингдек, ҳаво почта жўнатмаларининг расмийлаштирилиши ҳам тўхтатилади.
Гонконг расмийлари бу чорани АҚШнинг асоссиз босими ва ноқонуний бож солиш ҳаракатларига жавобан кўрмоқда. Баёнотда таъкидланишича: “Hongkong Post АҚШ номидан бож ундирмайди ва ноқонуний босимларга рози бўлмайди.”
Шунга қарамай, мазкур чеклов фақатгина тижорий товарларга тааллуқли бўлиб, ҳужжатларни ўз ичига олган жўнатмаларга татбиқ этилмайди.
Эслатиб ўтамиз, яқинда АҚШ маъмурияти 2 майдан бошлаб Хитой, жумладан Гонконгдан юбориладиган почта жўнатмалари учун амал қилган божсиз режимни бекор қилишини эълон қилган эди.
