Индонезиядаги энг баланд вулқонлардан бири отилиб чиқди
Ҳозирда хавфсизлик чоралари кучайтирилмоқда.
Индонезиянинг Шарқий Жава вилоятида жойлашган Семеру вулқони яна беш марта отилиб, минтақадаги фаоллиги кескин ортмоқда.
Кузатувчиларнинг қайд этишича, вулқон кратеридан кўтарилган кул устуни 1 минг метр баландликка, яъни денгиз сатҳидан 4 676 метр баландликка етган. Кул Шимолий ва Шимоли-шарқий йўналишда катта зичлик билан тарқалган.
Индонезия Вулканология ва геологик фалокатларни юмшатиш маркази аҳолига ва сайёҳларга хавфсизлик чораларини кучайтиришни тавсия этмоқда. Хусусан, иссиқ тошларнинг улоқтирилиши хавфи туфайли кратер атрофидаги 3 километрли ҳудудга яқинлашмаслик кераклиги айтилмоқда.
Маълумот учун, Семеру — Индонезиядаги тўртинчи энг баланд вулқон (3676 метр) бўлиб, Жава оролидаги энг баланд нуқта ҳисобланади.
Индонезия дунёдаги энг йирик архипелаг ҳисобланиб, 18 минг оролдан иборат. Мамлакат Тинч океанидаги “Олов ҳалқаси”да жойлашган бўлиб, юқори даражадаги сейсмик фаоллик билан ажралиб туради. Бу ерда 500 дан ортиқ вулқон мавжуд, уларнинг 130 га яқини фаол ҳисобланади.
