Хитой АҚШга нисбатан босимини кучайтирмоқда
Хитой Boeing самолётларни сотиб олишни тақиқлади.
Хитой ва АҚШ ўртасидаги савдо уруши яна бир бор кескинлашди. Хитой ҳукумати ўз авиакомпанияларига америкалик авиагигант Boeing'дан самолёт, эҳтиёт қисмлар ва тегишли ускуналарни харид қилишни қатъиян тақиқлади. Бу қарор, Пекиннинг Вашингтоннинг протекционистик сиёсатига нисбатан кескин жавоби сифатида талқин қилинмоқда.
Маълум қилинишича, Хитой ҳозирда Boeing самолётларини ижарага олган маҳаллий авиакомпанияларга молиявий ёрдам кўрсатиш йўлларини ўрганмоқда. Айни вақтда 10 га яқин Boeing 737 Мах самолёти Хитой авиапаркига ўтишга тайёр, аммо ушбу тақиқ сабабли ушбу жараён қийинлашмоқда.
АҚШнинг Хитойга нисбатан божларни умумий ҳисобда 145 фоизгача кўтариши Пекинда кескин норозилик уйғотган. Жавобан, 12 апрелдан бошлаб Хитой ҳам АҚШ маҳсулотларига нисбатан бож ставкаларини 84 фоиздан 125 фоизгача оширди.
Мазкур қарор глобал авиация бозорига ҳам, икки давлат ўртасидаги иқтисодий алоқаларга ҳам сезиларли таъсир кўрсатиши кутилмоқда. Мутахассислар фикрича, Хитойнинг Boeing'га нисбатан қадамларидан энг кўп зарар кўрадиган томон айнан АҚШ авиация саноатининг ўзи бўлади.
