АҚШ портларига Россия кемалари киришини тақиқловчи фармон узайтирилди
Трамп Россия кемалари киришини 2026 йилгача ман қилди.
АҚШ президенти Доналд Трамп мамлакат портларига Россия билан боғлиқ кемаларнинг киришини тақиқловчи чорани яна бир йилга узайтирди. Бу ҳақда Оқ уй ҳужжатлари Федерал реестрда эълон қилинди.
Хабарларга кўра, тақиқ Россия байроғи остида юрадиган ёки Россия Федерацияси билан алоқадор бўлган барча кемаларни қамраб олади. Трампнинг баёнотида қайд этилишича, “Россия ҳукуматининг сиёсати ва ҳаракатлари АҚШ ташқи сиёсатига зарар етказишда ва миллий фавқулодда ҳолатни юзага келтиришда давом этмоқда”.
Эслатиб ўтамиз, ушбу чеклов илк бор 2022 йил 21 апрелда Президент Жо Байден томонидан жорий қилинган эди. Янги фармонда Россияга алоқадор деб топилган кемаларнинг аниқланиш мезонлари ҳам қайд этилган: бу кемалар Россия байроғи остида юриши, эгаси Россия ҳукумати, компанияси, фуқароси ёки доимий резиденти бўлиши, ёки кемани тижорат мақсадларида бошқараётган шахслар Россияга тегишли бўлиши керак.
Мазкур қарор АҚШнинг Россияга қарши давом этаётган сиёсий ва иқтисодий санкциялари доирасида амалга оширилмоқда.
