Шимолий Корея Россия-Украина урушидан миллиардлаб даромад олди
Россия ҳарбийлари ўқ-дориларнинг ярмидан ортиғини Шимолий Кореядан олмоқда.
Жанубий Корея Мудофаа тадқиқотлари институти (КИДА) ҳисоботида хабар беришича, Шимолий Корея Россияга қурол-яроғ етказиб бериш орқали Украина урушидан 20 миллиард доллардан ортиқ фойда кўрган.
Ҳисоботга кўра, Пхенян Россияга асосан артиллерия снарядлари ва бошқа ўқ-дорилар етказиб берган. Бундан ташқари, КХДР ҳарбий хизматчиларини уруш зонасига юбораётгани ва Россияга техник ёрдам кўрсатаётгани ҳам қайд этилган.
Тахминларга кўра, Шимолий Корея бу хизматлари эвазига Москвадан юқори технологияли қуроллар олмоқда.
Reuters ва Британиянинг Open Source Center ташкилотлари томонидан олиб борилган кузатувларга кўра, сўнгги 20 ой ичида КХДРдан Россияга камида 64 марта қурол ташилган. Бу ташувларда жами 4 миллиондан 6 миллионгача снаряд етказиб берилган.
Маълумотларга қараганда, айни вақтда Россия фронтда фойдаланаётган ўқ-дориларнинг қарийб ярми Шимолий Корея манбаларидан олинмоқда.
