Шимолий Кореядаги тоғ биринчи бор ЮНEСКО рўйхатига киритилди
Паэкту тоғи Глобал геопарк мақомига эга бўлди.
Шимолий Кореяда жойлашган Паэкту тоғи илк бор ЮНEСКО томонидан Глобал геопарк сифатида тан олиниб, мамлакат тарихида биринчи марта халқаро миқёсда бундай мақомга эга бўлди.
Паэкту тоғи – Шимолий Корея ва Хитой чегарасида жойлашган фаол стратовулқон бўлиб, Корея ярим оролидаги энг баланд чўққи ҳисобланади. У нафақат табиий гўзаллиги, балки тарихий ва маданий аҳамияти билан ҳам ажралиб туради. Тоғ ҳақида кўплаб афсоналар мавжуд, хусусан, бу жой биринчи Корея давлатининг афсонавий асосчиси Тангуннинг туғилган жойи деб эътироф этилади. КХДР ҳукумати эса Кимлар сулоласининг келиб чиқишини “муқаддас Паэкту қони” билан боғланади.
Бунга қадар Шимолий Корея ЮНEСКО каби халқаро ташкилотлар билан чекланган алоқаларда бўлиб келган. Янги мақом сайёҳлик ва маданий ҳамкорлик соҳасида ўзгаришларга олиб келиши мумкин. Бироқ, ҳозирча мамлакатнинг изоляцион сиёсати фонида бу мақомнинг амалий таъсири қандай бўлиши номаълумлигича қолмоқда.
