Халқаро буйрак трансплантация жиноий тармоғи фош этилди

 

Германиянинг нуфузли ОАВлари — Der Spiegel, ZDF ва Deutsche Welle томонидан ўтказилган журналистик суриштирув натижаларига кўра, Кения ҳудудидаги Элдорет шаҳрида жойлашган Медиҳеал клиникасида ноқонуний буйрак трансплантацияси операциялари ўтказилаётгани аниқланган. Улар орасида Озарбайжон, Қозоғистон ва Покистон фуқаролари донор сифатида жалб қилинган.

 

Терговга кўра, Германия ва Исроил каби мамлакатлардаги бадавлат беморлар буйрак трансплантацияси учун узоқ йиллар навбат кутмаслик мақсадида ушбу ноқонуний тармоқ хизматларидан фойдаланган. Донорлар беморлар билан ҳеч қандай қариндошлик алоқасига эга бўлмаган бўлсада, расмий ҳужжатларда улар “яқин қариндош” сифатида кўрсатилган.

 

Айниқса хавотирли жиҳати — баъзи донорлар вояга етмаган, тилни билмаган, ва операциянинг оқибатларини тўлиқ тушунмаган ҳолда ҳужжатларни имзолашга мажбур бўлган.

 

Суриштирув давомида аниқланишича, Германияда буйрак трансплантациясини кутаётганлар сони 10 000 дан ортиқ, кутиш муддати эса 8–10 йилни ташкил этади. Шу сабабли айрим беморлар чет элда ноқонуний трансплантация хизматларига мурожаат қилмоқда. Улар орасида Гунзенхаузен шаҳридан 57 ёшли Сабине Фишер-Куглер ҳам бор. У 24 ёшли озарбайжонлик донордан буйрак олган. Расмий ҳужжатларга кўра, операция “бепул” деб кўрсатилган бўлсада, беморнинг ўзи 100–200 минг доллар оралиғида маблағ сарфлаганини тан олган.

 

Медиҳеал клиникасининг асосчиси ва раҳбари ҳиндистонлик собиқ депутат Сваруп Мишра ҳозирда Кения давлат биотехнология институти раҳбари бўлиб ишламоқда. У ЖССТ билан алоқаларда мамлакат вакили сифатида чиқиш қилсада, орган савдосига оид саволларга жавоб беришдан бош тортган.

 

Ноқонуний операциялар натижасида донорларнинг кўпчилиги соғлиқ билан боғлиқ жиддий муаммолар ва руҳий зўриқишларга дуч келган.