Хитойда 7 ёшли болага дунёдаги энг митти сунъий юрак ўрнатилди

 

Хитойлик шифокорлар етти ёшли беморга дунёдаги энг кичик сунъий юракни муваффақиятли ўрнатишди. Бу болалар трансплантацияси соҳасида муҳим тиббий ютуқ сифатида қайд этилмоқда.

 

Жарроҳлик амалиёти 15 апрель куни Цехе касалхонасида, Хуажун фан ва технология университети Тунсзи тиббиёт коллежига қарашли марказда бўлиб ўтди. Операцияга юрак-қон томир жарроҳлиги бўлими бошлиғи Дун Нянго бошчилик қилди.

 

Бемор юрак етишмовчилигининг оғир босқичида бўлган. Шифокорлар уч йил давомида ишлаб чиқилган магнитли левитацияли сунъий насос ёрдамида боланинг юрак ва ўпка фаолиятини тиклашга эришган.

 

Ўрнатилган қурилма атиги 45 грамм вазнга эга бўлиб, диаметри 2,9 сантиметрни ташкил этади. Бу учинчи авлод сунъий юрак ҳисобланади ва олдинги моделларга нисбатан энергияни кам сарфлайди, узоқроқ ишлайди, юқори ишончлиликка эга ҳамда бемор танасининг ҳолатига мослаша олади.

 

“Бугунги тайёр қурилмаларнинг аксарияти катталар учун мўлжалланган. Вазни 15 килограммдан кам, кўкрак қафаси тор болалар эса илгари бундай амалиётлардан четда қолиб келган эди”, — деди доктор Нянго.

 

Статистик маълумотларга кўра, Хитойда ҳар йили юрак билан боғлиқ оғир муаммолар сабабли 40 000 га яқин бола даволанишга муҳтож бўлади, уларнинг 10 фоизи эса юрак трансплантациясига эҳтиёж сезади.