Полшада илк аёл F-16 учувчиси тарихга кирди
Полша ҳаво кучларида илк бор аёл қирувчи учувчиси тайёрланди.
Полша ҳарбий-ҳаво кучлари тарихида илк бор аёл офицер F-16 қирувчи самолётини бошқариш малакасини олди. Бу ҳақда мамлакат мудофаа вазири Владислав Косиняк-Камиш расмий саҳифасида хабар берди.
"Бу жуда муҳим воқеа — биринчи аёл F-16 учувчиси", — деди вазир. Унинг сўзларига кўра, аёл офицер 32-тактик авиабазада, Ласк шаҳрида хизмат қилади. У F-16 учун зарур бўлган махсус тайёргарликни АҚШдаги малака ошириш курсларида тамомлаган.
Вазир яна бир аёл учувчи ҳозирда 31-ҳарбий базада тайёргарлик босқичида эканини айтиб, бу жараён Полша ҳарбийларига аёлларни фаол интеграция қилиш сиёсатининг бир қисми эканини таъкидлади.
Маълумот учун, ҳозирда Полша ҳаво кучлари ихтиёрида 48 та F-16 кўп мақсадли қирувчи самолёти мавжуд. Аёлларнинг жанговар авиацияга қўшилиши қуролли кучларда гендер тенгликка эришиш йўлидаги глобал тенденцияларнинг бир кўриниши ҳисобланади.
