АҚШ армияси фахрийси самолётни олиб қочди
У икки йўловчи ва учувчини жароҳатлаган.
49 ёшли америкалик Акинела Сава Тейлор Марказий Американинг Белиз давлатида ички авиарейсни амалга ошираётган самолётни олиб қочишга уринди. У учувчига пичоқ билан таҳдид қилиб, самолётни бошқа йўналишга буришни талаб қилган. Қароқчиликка уринган собиқ ҳарбий воқеа жойида қурол олиб юришга рухсати бўлган йўловчи томонидан зарарсизлантирилди.
Тропис Аир авиакомпаниясининг Сессна Сараван (В3-ҲИГ) самолёти Корозалдан Сан-Педрога парвоз қилаётган эди. Бортда 14 йўловчи ва 2 нафар экипаж аъзоси бўлган. Парвоз вақтида Тейлор пичоқ чиқарган ва учувчига таҳдид солган. Учувчи фавқулодда сигнал бергач, вазият жиддий тус олган.
ОАВ маълумотларига кўра, Тейлор икки йўловчи ва учувчини жароҳатлаган. Қароқчини йўловчилардан бири тўхтатган ва самолёт ёқилғи тугай язганда, учувчи уни хавфсиз тарзда қирғоқ бўйидаги шаҳарга қўндиришга муваффақ бўлган. Кўкрак қафасидан ўқ еган Тейлор касалхонага олиб кетилаётганда вафот этган.
Тейлор АҚШда ўрта мактаб ўқитувчиси ва футбол мураббийи бўлиб ишлаган. У Белизга қандай қилиб визасиз киргани ҳозирда текширув остида. Расмийлар ҳодиса юзасидан тергов олиб бормоқда.
