Меҳнат мигрантларининг имтиҳонлари Россия ғазнасини тўлдирмоқда
Россия миграция имтиҳонларидан 30 миллион доллар фойда олди.
Россияда меҳнат мигрантларининг тил, тарих ва ҳуқуқий билимлардан имтиҳон топшириши ортидан давлат бюджетига 2,5 миллиард рубль (тахминан 30,4 миллион доллар) тушган. Бу ҳақда Давлат Думасидаги “Ягона Россия” партияси раҳбари Владимир Василев маълум қилди.
Унинг сўзларига кўра, авваллари бу соҳадаги маблағлар коррупциявий схемаларда йўқолган бўлса, эндиликда тўғридан-тўғри давлат ғазнасига йўналтирилмоқда.
Маълумот учун, 2024 йил октябрь ойида Россия Давлат Думаси имтиҳон жараёнларини давлат тасарруфига ўтказиш бўйича қонун қабул қилган. Натижада ягона тарифлар белгиланди:
- Яшаш ҳуқуқи олиш учун имтиҳон — 5 900 рубль,
- Ишлаш ҳуқуқи учун имтиҳон — 3 800 рубль.
Ушбу ўзгаришлар нафақат давлат бюджетини мустаҳкамлаш, балки мигрантлар учун тартиб-қоидаларни шаффофлаштиришга қаратилган муҳим қадам сифатида баҳоланмоқда.
