Қозоғистонда болалар футбол жамоаси микроавтобуси ҳалокатга учради
Фожиа оқибатида мураббий воқеа жойида ҳалок бўлган.
Қозоғистоннинг Акмола вилоятида болалар футбол жамоасини олиб кетаётган микроавтобус ҳалокатга учради. Автоҳалокат оқибатида жамоа мураббийи воқеа жойида вафот этган, 14–16 ёш орасидаги 16 нафар бола эса турли даражадаги тан жароҳатлари билан шифохонага ётқизилган. Бу ҳақда вилоят Ички ишлар бошқармаси расмий баёнот берди.
Воқеа юк машинасини қувиб ўтиш чоғида содир бўлган. Расмий маълумотларга кўра, микроавтобус ҳайдовчиси йўл ҳаракати қоидаларини бузган ва бошқарувни йўқотган. Оқибатда автобус ағдарилиб кетган.
Шифокорларнинг билдиришича, ҳозирда барча болалар тиббий назорат остида, уларнинг ҳаёти хавф остида эмас. Воқеа юзасидан тергов ҳаракатлари олиб борилмоқда.
Бу фожиа Қозоғистонда болалар хавфсизлигини таъминлаш, айниқса оммавий спорт тадбирларида қатнашаётган ўқувчиларнинг ҳаётини муҳофаза қилиш борасида жиддий саволларни келтириб чиқарди.
