Тунисда сиёсий босим кучаймоқда

 

Тунис судлари томонидан бир неча сиёсатчилар, таниқли бизнесменлар ва юристлар 13 йилдан 66 йилгача бўлган муддатга озодликдан маҳрум этилди.

 

Суд қарорига кўра, улар давлат хавфсизлигига қарши фитна уюштиришда айбдор деб топилган. Мухолифат бу айбловларни асоссиз деб ҳисоблайди ва буни президент Қайс Саиднинг тобора кучайиб бораётган авторитар бошқарувининг яна бир исботи сифатида баҳоламоқда.

 

Хабарларга кўра, ушбу иш доирасида жами 40 киши, жумладан машҳур сиёсатчилар, бизнесменлар ва журналистлар жавобгарликка тортилган. Айбловлар эълон қилингач, 20 дан ортиқ шахс мамлакатни тарк этган.

 

Расмийлар улардан айримлари, жумладан собиқ амалдорлар ва собиқ разведка ходимлари, мамлакатда вазиятни беқарорлаштириш ва президент Саидни ҳокимиятдан ағдаришга уринганини даъво қилмоқда.

 

Қайс Саид эса ўзига нисбатан илгари сурилган “диктатурани ўрнатишга уриниш” айбловларини рад этган. У, ўз сўзларига кўра, сиёсий элита орасидаги кенг тарқалган коррупция ва тартибсизликка қарши кураш олиб бормоқда.

 

Ҳуқуқни ҳимоя қилувчи ташкилотлар эса президент Саид 2021 йилда парламентни, 2022 йилда эса Олий суд кенгашини тарқатиб юборгани ортидан барча қонун чиқарувчи ва суд тизимлари устидан тўлиқ назорат ўрнатганини таъкидлашмоқда.