Полшада кучли ёмғир сув тошқинига сабаб бўлди
Кучли ёмғир уч кундан буён давом этмоқда.
Полшанинг жануби-шарқида жойлашган Пшемисл шаҳрида уч кундан буён давом этаётган кучли ёғингарчилик оқибатида кўчаларни сув босди. Маҳаллий матбуотга кўра, 60 мингга яқин аҳоли яшайдиган шаҳарда тоза ичимлик суви ва электр таъминотида узилишлар кузатилмоқда.
Қутқарув ишлари жадал давом этмоқда, фавқулодда ҳолат хизматлари сувни насослар орқали чиқариш ва аҳолини хавфсиз жойларга кўчириш билан банд. Вақтинча яшаш жойлари ташкил қилинган.
Ҳозирча жабрланганлар ва қурбонлар ҳақида расмий маълумот берилмаган. Об-ҳаво мутахассислари яқин кунларда ёмғир давом этишини тахмин қилмоқда.
