Рим папаси Франциск вафот этди
У Рим-католик черковига 12 йил раҳбарлик қилган.
Рим-католик черкови етакчиси, папа Франсиск 88 ёшида вафот этди. Бу ҳақда Ватикан телеканали орқали кардинал Кевин Фаррелл хабар берди.
Февраль ойининг ўрталарида понтифик нафас йўллари инфекцияси билан касалхонага ётқизилган ва март ойининг охиригача шифохонада қолган. 23 март куни пневмониядан даволанишдан сўнг Ватикан ҳудудига қайтган эди. 20 апрель куни у Авлиё Пётр собори майдонида диндорларни Пасха байрами билан табриклаш учун сўнгги бор омма олдида кўриниш берган.
Аргентинада туғилган папа Франсиск 2013 йилда тахтга ўтирган бўлиб, Рим-католик черковига 12 йил раҳбарлик қилган. У ёшлигида оғир касаллик сабаб ўпкасининг бир қисмини олдирган, шунинг учун нафас йўллари билан боғлиқ касалликлардан тез-тез азият чеккан. Сўнгги йилларда эса тиззаларидаги муаммолар туфайли ногиронлик аравачаси ва ҳассадан фойдаланган.
Папа Франсиск жаҳон миқёсида тинчлик, иқлим муҳофазаси ва ижтимоий адолат масалаларида фаол чиқишлари билан танилган эди. Ватиканда янги понтифик сайлови яқин кунларда эълон қилиниши кутилмоқда.
