Доналд Трампнинг рейтинги рекорд даражада пасайди
Бунга юритилаётган таълим сиёсати сабаб бўлмоқда.
16–21 апрель кунлари ўтказилган сўров натижаларига кўра, АҚШ президенти Доналд Трампнинг фаолиятини қўллаб-қувватловчи америкаликлар сони рекорд даражада камайди. Сўровда қатнашган 4,300 дан ортиқ фуқароларнинг атиги 42 фоизи унинг сиёсатини маъқуллаган бўлса, 53 фоизи норозилигини билдирган.
Таҳлилчилар рейтингдаги пасайишни Трамп маъмуриятининг университетлар бўйича жорий қилган қарорлари билан боғлашмоқда. Хусусан, АҚШ Таълим вазирлиги апрель ойида Гарвард университетига ажратилган 2,2 миллиард долларлик грантлар ва 60 миллион долларлик шартномаларни музлатиб қўйди. Бу қарор жамиятда кенг баҳс-мунозараларга сабаб бўлди.
Сўров иштирокчиларининг 59 фоизи АҚШнинг халқаро таъсири сусайганини таъкидлаган. Бундан ташқари, респондентларнинг 75 фоизи Доналд Трампнинг 2028 йилги президентлик сайловларида учинчи бор номзод сифатида қатнашишига қарши эканини билдирган.
